Samri Ka Bachda

Firon ki Halakath ke baad Bani Israel iss ke panje se azad ho kar imaan laye aur Hazrate Musa Alaihis Salam ko khudavande karim ka ye hukum huva ki vo chalis saron ka kohe toor par Yetikaf karen iss ke baad unhen kitab (Toraith) di jayegi. Chunanche, Hazrate Musa Alaihis Salam kohe toor par chale gaye aur bani israel ko apne bhai hazrate haroon Alaihis Salam ke supurd kar diya. Aap 40 din tak din bhar rozdar rah kar sari raath ibadath me mashgul rahe.

Samri:

              Bani Israel me ek Harami Shakhs tha jiss ka naam Samri tha jo tabayi tor par nihayath gumraah aur gumraah kun admi tha. Iss ki maa ne biradari me rusvayi va badnami ke dar se iss ko paida hote hi pahad ke ek ghaar me chod diya tha aur Hazrate Jibrael Alaihis Salam ne iss ko apni ungli se dood pila pila kar pala tha. Iss liye ye Hazrate Jibrael Alaihis Salam ko pahchanta tha. iss ka pura naam "Musa Samri" hai aur Hazrate Musa Alaihis Salam ka naam bhi "Musa" hai. Musa Samri ko Hazrate Jibrael Alaihis Salam ne pala tha aur Hazrate Musa Alaihis Salam ki parvarish firon ke Ghar huyi thi. Magar Khuda ki Shaan ki firon ke ghar parvarish pane vale Musa Alaihis Salam to khuda ke rasool huve aur Hazrate Jibrael Alaihis Salam ka pala huva musa samri kafir huva aur bani israel ko gumrah kar ke uss ne bachde ki puja karayi. iss bare me kisi arif ne kai khoob kaha hai :

            Yani jab koi Admi Azal hi se nek bakhth nahi hota to vo bhi namurad hota hai. Aur uss ki parvishi karne vale ki koshish bhi nakam aur namurad hoti hai. Dekh lo musa samri jo hazrate jibrael alaihis sallam ka pala huva tha vo kafir huva aur hazrate musa alaihis salam jo firon ki parvarish me rahe vo khuda ke rasool huve. Iss ka raaz yehi hai ki musa samri azali shaki aur paidayishi bad bakhth tha to hazrate jibrael alaihis salam ki tarbiyath aur parvarish ne iss ko kuch bhi nafaa na diya, aur vo kafir ka kafir hi rah gaya aur hazrate musa alaihis salam chunki azali syed aur nek bakhth the iss liye firon jaise kafir ki parvarish se bhi un ko koi nuksan nahi pahuncha.

          

 Jin dino Hazrate Musa Alaihis Salam kohe toor par motakif the. samri ne Aap ki ghair mojudgi ko ghanimath jana aur ye fitna barpa kar diya ki uss ne bani israel ke sone chandi ke zevarath ko mang kar pighlaya aur uss se ek bachda(cow) banaya. aur hazrate jibrael alaihis sallam ke ghode ke kadmon ki khak jo uss ke pass mahafuz thi uss ne vo khak bachde ke muh me dal di to vo bachda bolne laga. Fir samri ne bani israel se ye kaha ki ye meri khom ! Hazrate Musa Alaihis Salam kohe toor par khuda azzawajal ke didar ke liye tashrif le gaye hain. Halanki tumhara khuda to yehi bachda hai. lihaza tum log isi ki ibadat karo. samri ki iss takhrir se bani israel gumrah ho gaya aur 12000 admiyon ke siva sari khom ne chadi sone ke bachde ko bolta dekh kar uss ko khuda man liya aur uss ke age sar ba sujud ho kar uss bachde ko pujne lage. Chunanche, Khudavande Khuddus ka irshad hai :

Tarjuma e Kanzul Imaan:

                  Aur Musa ke baad uss ki khom apne zevaron se ek bachda bana baithi, be jaan ka dhad,gaay ki tarha avaz karta.

             Jab 40 dino ke baad Hazrate Musa Alaihis Salam Khuda Azzawajal se ham kalam ho kar aur Torath Sharif saath le kar basti me tashris laye aur khom ko bachda pujte huve dekha to Aap par behad gazab va jalal tari ho gay. Aap ne joshe gazab me Torath sharif ko zamin par dal diya aur apne bhai Hazrate Haroon Alaihis Salam ki Dadi aur Saar ke baal pakad kar ghasitna aur marna shuru kar diya aur farmane lage ki kuin tum ne in logon ko iss kam se nahi roka. Hazrate Haroon Alaihis Salam majerath karne lage.Jaisa ki Quran e Majid me hai :

Tarjuma e Kanzul Imaan:

                   Kaha : Ye Mere Maa ! Jaya khom ne mujhe kamzor samajha aur kharib tha ki mujhe mar dalen to mujh par dushmano ko na hansa aur mujhe zalimo me na mila.

         Hazrate Haroon Alaihis Salam ki Majerath sun kar hazrate Musa Alaihis Salam ka gussa thanda pad gaya. Iss ke baad Aap ne apne bhai Hazrate Haroon Alaihis Salam ke liye Rahamath Va Magfirath ki dua mangi. Fir apne uss bachde ko tod fod kar aur jala kar aur uss ko reza reza kar ke darya me baha diya.

Read me: Dunya Ki Sab Se Khimti Gay

Darse Hidayath:

              Mazkura Bala Qurani vakhiya se khas tor par do sabak milte hain :

1. Iss se Ulmaye kiram ko ye sabak milta hai ki ulmaye kiram ko kabhi apne mazhab ke avam ki taraf se gafil nahi rahana chahiye balki hamesha avam ko mazhabi baten batate rahana chahiye.Aap ne dekha ki samri ne 40 din Hazrate Musa Alaihis Salam ki ghair maujudgi se faida utha kar sari khom ko bahaka kar gumrah kar diya. Isi tarha agar ulmaye ahle sunnath apni khom ki hidayath va khabrgiri se gafil rahenge to bad mazhabon ko moka mil jayega ki in logon ko bahaka kar gumrah kar den.
2. Hazrate Jibrael Alaihis Salam ke Ghode ke Paon ki Khak me jab ye asar tha ki bachde ke muh me padte hi bachda bolne laga to iss se malum huva ki Allah valon ke khadmo ke niche ki khak me bhi khairo barkath ke asarath huva karte hain. lihaza khuda ke nek bandon ke gubar alud kadmo ko dho kar makano me pani chidakna jaisa ki baaz khush akhida muridin ka tarikha hai ye koi lagav aur bekar kam nahi balki iss se fuyuzo barkath aur favayid hasil hone ki ummid hai aur ye sharAn jayiz bhi hai.