Hazrate Dawood Alihis Salam Kis Tarha Badshaah Bane

Jab Talut Bani Israel ke Badshaah ban gaye to Aap ne Bani Israel ko jihad ke liye tayyar kiya aur ek kafir badshaah " Jalut" se jangh karne ke liye Apni foj ko le kar maidane jangh me nikale. Jalut bahuth hi Khad Avar aur Nihayath hi takatvar badshaah tha. Vo apne saar par lohe ki jo topi pahanta tha uss ka vazan tin sau(300) rathl tha. Jab dono fojen maidane jangh me ladayi ke liye saaf arayi kar chukin to Hazrate talut ne apne lashkar me ye Aylan farma diya ki jo shakhs jalut ko khathl karega, main apni shahazadi ka nikah uss ke saath kar dunga. Aur apni Adhi Saltanath bhi uss ko ata kar dunga ye farmane shaahi sun kar Hazrate Dawood Alaihis Salam age bade jo Abhi bahuth hi kamsin the aur bimari se chehra zard ho raha tha. Aur gurbath va muflisi ka ye alam tha ki bakriyan chara kar iss ki ujrath se guzar basar karte the. Rivayath hai ki jab Hazrate Dawood Alaihis Salam ghar se zihad ke liye ravana huve the to raste me ek patthar ye bola ki ye hazrate dawood ! mujhe utha lijiye kuinki main hazrate musa alaihis salam ka patthar hun. Fir dusre patthar ne Aap ko pukara ki ye hazrate dawood! Mujhe utha lijiye kuinki main hazrate Haroon Alaihis Salam ka patthar hun.Fir ek tisre patthar ne Aap ko pukar kar arz kiya ki ye hazrate dawood alaihis salam mujhe utha lijiye kuinki main jalut ka khatil hun. Aap Alaihis Salam ne un tino(3) pattharon ko utha kar apne jhole me rakh liya. Jab jangh shuru huyi to Hazrate Dawood Alaihis Salam apni gofan le kar safon se age bade aur jab jalut par Aap ki nazar padi to Aap ne in tino(3) pattharon ko apni gofan me rakh kar aur bismillah pad kar gofan se tino pattharon ko jalut ke upar fenkha aur ye tino patthar ja kar jalut ki nak aur khopdi par lage aur uss ke bheje ko fash fash kar ke saar ke piche se nikal kar tis(30) jalutiyon ko lage aur saab ke saab makhtul ho kar gir pade.Fir Hazrate Dawood Alaihis Salam ne jalut ki lash ko ghasit te huve la kar apne badshaah talut ke kadmon me dal diya iss par hazrate talut aur bani israel be had khush huve.

Jalut ke katl ho jane se uss ka lashkar bhag nikla aur Hazrate Talut ko fatah mubin ho gayi aur apne Aylan ke mutabik Hazrate Talut ne Hazrate Dawood Alaihis Salam ke saath apni ladki ka nikah kar diya aur apni Adhi saltanath ka in ko sultan bana diya. Fir pure chalis(40) baras ke baad jab Hazrate Talut Badshaah ka intikhal ho gaya to hazrate dawood alaihis salam puri saltanath ke badshaah ban gaye aur jaab Hazrate Shamvil Alaihis Salam ki vafaath ho gayi to Allah Tala ne Hazrate Dawood Alaihis Salam ko saltanath ke saath Nabuvath se bhi sarfaraz farmadiya. Aap se pahale saltanath aur nabuvath dono Yezaz ek saath kisi ko bhi nahi mila tha. Aap pahale shaks hain ki in dono Ohdon par fayiz ho kar sattar baras tak saltanath aur nabuvath dono mansabon ke farayiz pure karte rahe aur fir Aap ke baad Aap ke farayiz Hazrate Suleman Alaihis Salam ko bhi Allah Tala ne Saltanath aur Nabuvath dono martabon se sarfaraz farmaya.

Iss vakhiye ka ijmali bayan Quran e Majid ki Surah Bakhra me iss tarha hai ki

Tarjuma e Kanzul Imaan:
                Aur katal kiya dawood ne jalut ko aur Allah ne use saltanath aur hikmat ata farmayi aur use jo chaha sikhaya.

Hazrate Dawood Alaihis Salam ka zariya e ma-asha:-
Hazrate Dawood Alaihis Salam ne ba vazud ye ki Azim saltanath ke badshaah the magar sari umr voh apne haath ki dastkari ki kamayi se apne khurdo nosh saman karte rahe. Allah Tala ne Aap ko ye Mojiza ata farmaya tha ki Aap lohe ko haat me lete to vo mom ki tarha narm ho jaya karta tha aur Aap us se zirhe banaya karte the aur in ko farokhth kar ke iss rakham ko apna zariya e ma-asha banaye huve the aur Allah Tala ne  Aap ko parandon ki boli sikha di thi.




Dars e Hidayath:

1. Hazrate Talut ki sargujashth ki tarha hazrate dawood alaihis salam ki mukhaddas zindagi se yehi sabak milta hai ki Allah Tala jab apna fazlo karam farmata hai to ek lamhe me rayi pahad aur  zarre ko aftab bana deta hai. Ghor karo ki hazrate dawood alaihis salam ek kamsin ladke the aur khuda nihayath hi muflis aur ek gharib baap ke bete the. Magar achanak Allah Tala ne in ko kitne azim aur bade bade maratib va darjath ke yezaz se sarfaraz farma diya ki in ke saar par taje shaahi rakh kar inhen badshaah bana diya. Aur ek badshaah ki shahzadi in ke nikah me ayi aur fir nabuvath ka buland martaba inhen ata farma diya ki iss se bad kar insan ke liye koi buland martaba ho sakta hi nahi. Fir Allah Tala ki khudrate khahira ka jalva dekho ki jalut jaise jabir aur takathvar badshaah ka katil hazrate dawood alaihis salam ko bana diya jo ek kamsin ladke aur bimar the aur vo bhi in ke tin pattharon se katl huva. Halanki jalut ke samne in chote chote tin pattharon ki kai hakhikhat thi? Jab ki vo 300 tatal vazan ki fauladi topi pahane huva tha. Magar hakhikhat to ye hai ki Allah Tala agar chahe to ek chunti ko hathi par galib kar de aur Allah Tala agar chahe to hathi ek chunti ka kuch bhi nahi bigad sakta.
2. Vakhiya mazkura bala me Aap ne pad liya ki talut dabgari yani chamda pakane ka pesha karte the ya bakriyan charate the aur hazrate dawood alaihis salam bhi pahale bakriyan charaya karte the aur fir jab Allah Tala ne in ko badshaah bana diya aur nabuvath ke sharf se bhi sarfaraz farma diya to inhon ne apna zariyae mAsh zirreh banane ke peshe ko bana liya. Iss se malum huva ki rizkhe halal talab karne ke liye koi pesha ikhtiyar karna khwa vo dabgari ho ya charvahi ho ya lohari ho ya kapda bunna ho, al gharaz koi pesha hargiz hargiz na zalil hai na in pesho ke zariye rozi hasil karne valon ke liye koi zillath hai. jo log bankaron aur dusre peshavaron ko mahaz in ke peshe ki biya par zalil va hakhir samajhte hain vo intihayi jahalath va gumrahi ke gade me gire huve hain. Rizkhe halal talab karne ke liye koi jayiz pesha ikhtiyar karna ye ambiya va mursalin aur salihin ka mukhaddas tarikha hai. Lihaza hargiz hargiz peshavar musalman ko hakhir jalil shumar nahi karna chahiye balki hakhikhat to ye hai ki peshavar musalman un logon se hazaron darje behtar hai jo sarkari nokariyon aur rishvaton aur dhoka dehi ke zariye rakame hasil kar ke apna pet palte hain aur apne sharif hone ka dava karte hain halanki sharAn us se zaida zalil kon hoga jis ki kamayi halal na ho ya mushtaba ho.