Hazrate Isa Alaihis Salam Ke 4 Mojizath

Hazrate Isa Alaihis Salam ne bani israel ke samne apni nabuvath aur mojizath ka yelan karte huve ye takrir farmayi. Jo Quran e Majid ki Surah e Ale Imraan me hain :

Tarjuma e Kanzul Imaan:

                   Aur Rasool hoga bani israel ki taraf ye farmata huva ki main tumhare pass ek nishani laya hun tumhare raab ki taraf se ki main tumhare liye mitti se parind ki si murath banata hun fir uss me funk marta hun to vo foran parinda ho jati hai Allah ke hukum se, aur shifa deta hun Madar zad andhe aur saped(safed) dagh vale ko, aur main murde jilata(zinda karta) hun Allah ke hukum se, Aur tumhen batata hun jo tum khate aur jo apne gharon me jama kar rakhte ho. Beshak in baton me tumhare liye badi nishani hai agar tum imaan rakhte ho.

                Iss takhrir me Aap ne apne char mojizath ka yelan farmaya :

1. Mitti ke parind bana kar in me funk mar kar in ko uda dena
2. Madar zad Andhe aur Kodi ko shifa dena
3. Murdon ko Zinda karna
4. Aur jo kuch khaya aur jo kuch gharon me chupa kar rakha uss ki khabar dena.

Jab in mojizath ki kuch tafsil bhi pad lijiye :

Mitti Ke Parind Bana Kar Uda Dena:

            Jab bani israyil ne ye mojiza talab kiya ki mitti ka parind bana kar uda de to hazrate Isa Alaihis Salam ne parindon me se chamgadad ko iss liye muntakhab farmaya ki parindon me saab se bad kar mukammal aur azibo gharib yehi parinda hai kuinki iss ke admi ki tarha danth bhi hote hain aur ye admi ki tarha hansta bhi hai aur ye bighair par ke apne bazuon se udta hai aur ye parinda janvaron ki tarha bachcha janta hai aur iss ko haiz bhi ata hai. Rivayath hai ki jab tak bani israel dekhte rahte ye chamgadad udte rahte aur agar un ki nazron se ojal ho jate to gir kar mar jate the. Yesa iss liye hota tha taki khuda ke paida kiye huve aur banda e khuda ke paida kiye parind me farakh aur imtiyaz baki rahe.

Madar zad Andhon Ki Shifa Dena:

Rivayath hai ki ek Din me pachas Andhon aur Kodiyon ko Aap ki dua se iss sharth par shifa hasil huyi ki vo imaan layenge.

Murdon Ko Zinda Karna:

           Rivayath hai ki Aap ne Char Murdon ko zinda farmaya : 

1. Azar Apne dosth ko.
2. Ek budiya ke ladke ko
3. Ek Ushr vasul karne vale ki ladki ko
4. Hazrate Saam Bin Nuh Alaihis Salam ko

Azar :-
           Ye Hazrate Isa Alaihi Salam ke ek Mukhlis Dost the jab in ka intikhal hone laga to in ki bahan ne Aap ke pass khasid bheja ki Aap ka dost mar raha hai. Uss vakht Aap apne dost se tin din ki  duri ki masafath par the. Azar ke intikhal va dafan ke baad hazrate Isa alaihis salam vohan pahunche aur azar ki khabr ke pas tashrif le gaye aur azar ko pukara to vo zinda ho kar apni khabr se bahar nikal aye aur barson zinda rahe aur sahibe avlad bhi huve.

Budiya Ka Beta :-
              Ye mar gaya tha aur log iss ka janaza utha kar iss ko dafan karne ke liye ja rahe the. Nagahan Hazrate Isa Alaihis Salam ka udhar se guzar huva  to vo Aap ki dua se zinda ho kar janaze se utha  baitha aur kapda pahan kar apne janaze ki charpahi uthaya huve apne ghar aya aur muddaton zinda raha aur uss ki avlad bhi huyi.

Ashir Ki Beti:-
                Ek chungi vasul karne vale ki ladki mar gayi thi. uss ki mauth ke ek din bad hazrate isa alaihis salam ki dua se zinda ho gayi aur bahut dino tak zinda rahi aur uss ke kayi bachche bhi huve.

Hazrate Saam Bin Nuh:-
                Upar ke tino murdon ko Aap ne zinda farmaya  to bani israel ke shariro ne kaha ki ye tino dar hakhikhath mare huve nahi the balki in tino par sakht tari tha iss liye vo hamesha me Aa gaye lihaza Aap kisi purane murde ko zinda kar ke hame dikhayiye to Aap ne farmaya ki hazrate saam bin nuh alaihis salam ko vafath paye huve char hazar baras ka zamana guzar gaya. Tum log mujhe un ki khabr par le chalo main un ko khuda ke hukm se zinda kar deta hun to Aap ne un ki khabr ke pas ja kar isme Azam pada to foran hi Hazrate Saam Bin Nuh Alaihis Salam khabr se zinda ho kar nikal aye aur ghabraye huve pucha ki kiyamath kayim ho gayi? fir vo hazrate isa alaihis salam par imaan laye fir thodi der baad un ka intikhal ho gaya.

Jo Khaya Aur Chupaya Uss Ko Bata Diya:

           Hadis Sharif me hai ki Hazrate Isaa Alaihis Salam Apne Makhtab me bani israel ke bachchon ko un ke maa baap jo kuch khate aur jo kuch gharon me chupa kar rakhte vo sab bata diya karte the. Jab validain ne bachchon se daryafth kiya ki tumhen in baton ki kaise khabar hoti hai ? To Bachchon ne bataya ki ham ko Hazrate Isa Alaihis Salam maktab me bata dete hain. Ye sun kar maa baap ne bachchon ko maktab jane se rok diya aur kaha ki hazrate isa alaihis salam jadugar hain(mazallah) jab hazrate isa alaihis salam bachchon ki talash me basti ke andar dakhil huve to bani israel ne apne bachchon ko ek makan ke andar chupa diya ki bachche yahan nahi hain ! Aap ne pucha ki ghar me kon hain ? To shariron ne kah diya ki ghar me suvar band hain. To Aap ne farmaya ki achcha suvar hi honge. Chunanche, Logon ne iss ke baad makan ka darvaza khola to makan me se suvar hi nikle. Iss baath ka bani israel me charcha ho gaya aur bani israel ne gaizo gazab me bhar kar Aap ke katl ka mansuba bana liya. Ye dekh kar hazrate isa alaihis salam ki valida hazrate bibi maryam raziyallau tala anha App ko saath le kar misar ko hizrat kar gayi. Isa tahar Aap shariron ke shar se muhfuz rahe.