Jangh E Badr Me5000 Angels(Farishte)

Jnagh E Badr Kuffar va Islam ka mashur Tarin Ma-Rika hain . 17 Ramzam  Si. 2 Hi. Me Makka Aur Madine ke Darmiyan Makhame "Badr" me ye jangh huyi. Iss ladayi me Tadad aur aslahe ke lihaz se musalman bahuth hi kamtar aur past hali me the. Musalmanon me Budde, Javan Aur Bachche aur Ansaar va Muhajirin kul mila kar 313 Mujahidine Islam Ilme nabvi ke zere saya kuffar ke ek azim lashkar se nabard azma the. Samane jangh ki killath ka ye alam tha ki puri islami foj me 6 zirreh aur 8 talvaren thi. Aur kuffar ka lashkar takriban ek 1000 nihayath hi janghju aur bahaduron par mushtamil tha aur in bahaduron ke saath ek 100 behtarin Ghode, 700 Unt aur khisam khisam ke mohlik hathyar the. Iss jangh me musalmano ki ghabrahat aur bechaini ek khudrati baath thi. Huzure Akram Sallallahu Alaihi o Sallam Raath bhar jaag kar Khuda Azzawajal se lo lagaye masrufe dua the ki.

            "Ilahi ! Agar ye chand nufus halak ho gaye to fir khiyamath  tak roohe zamin par teri ibadath karne vale na rahenge"

Dua mangte huve Aap ki chadar mubarak dosho anvar se zamin par gir padi aur Aap par rikhkhat tari ho gayi.Yahan tak ki Ansu jari ho gaye. Hazrate Abu Bakkar Siddiq Raziyallah Tala Anha Aap ke yare ghaar the. Aap ko iss tarha be kharar dekh kar un ke dil ka sakun va kharar jata raha. unhone chadar mubarakh utha kar Aap ke mukhaddas kandhe par daal diya aur Aap ka daste mubarak tham kar bharrayi huyi avaz me bade adab ke saath arz kiya ki Huzur ! Aab bas kijiye Allah Tala zarur apna vada pura farmayega. Apne yare ghaar siddiqe janisar Raziyallahu Tala Anha ki guzarish man kar Aap ne dua khatm kar di aur nihayath ithminan ke saath paighambarana lahje me ye farmaya ki.

Tarjuma e Kanzul Imaan:
                  Aab bhagayi jati hai ye jamaath aur pinte fer denge.

Subhah ko Huzur Sallallahu Alaihi o Sallam ne Aayate jihad ki tilavath farma kar yesa valvala Angrez vaaz farmaya ki mujahidin ki ragon me khoon ka khatra khatra josho kharosh ka samandar ban kar tufani mojen marne laga. Aur Aap Sallallau Alaihi o Sallam ne ye bisharath bhi di ki agar sabr ke saath tum mujahidin maidan e jangh me dhate rahe to Allah Tala tumhari madad ke liye asman se farishton ki foj bhej dega.
    
           Chunanche, 5000 Hazar farishton ki foj maidan e badr ki jangh me utar padi aur dam zadan me maidane jangh ka naksha hi badal gaya. Hazrate Ali Raziyallahu Tala Anha muhajirin ka jhanda lahra rahe the aur hazrate Saad Bin Ubaida Raziyallahu Tala Anha ansar ke alambardar the. Kuffar ke 70 admi katl ho gaye.Aur 70 giraftar huve bakhi apna sara saman chod kar farar ho gaye.Kuffar ke makhtulin me khuresh ke bade bade namvar sardar jo bahaduri aur sipahgiri me yaktaye rozgar the. ek ek kar ke saab mauth ke ghat utar diye gaye. Yahan tak ki kuffare khuresh ki lashkari takhath hi fana ho gayi. Musalmano me kul 14 khush nasibon ko shahadath ka sharf mila jin me 6 muhajir aur 8 ansaar the aur musalmano ko be shumar male ghanimath mila jo kuffar chod kar farar ho gaye the.

             Allah Tala ne janghe Badr aur farishton ki foj ka tazkira Quran e Majid me in lafjon ke saath farmaya ki.

Tarjuma e Kanzul Imaan:
                  Aur Beshak Allah ne Badr me tumhari madad ki jab ki tum bilkul be saro saman the . To Allah se daro ki kahin tum shukr guzar ho . Jab ye mehbub tum musalmano se farmate the : Kai tumhen ye kafi nahi ki tumhara raab tumhari madad kare 3000 hazar farishte utar kar, han kuin nahi agar tum sabr va takva karo aur kafir isi dam tum par Aa pade to tumhara raab tumhari madad ko 5000 farishte nishan vale bhejega aur ye fatah allah ne na ki magar tumhari khushi ke liye aur isi liye ki iss se tumhare dilon ko chain mile, aur madad nahi magar Allah Ghalib hikmath vale ke pass se.

Darse Hidayath:

              Jange Badr me musalmano ki tadad aur samaane jangh ki killath ke bavajud fatah mubin ne musalmano ke khadmo ka bosa liya. Iss se ye sabak milta hai ki fatah kasrate tadad aur samane jangh ki firavani par mokhuf nahi . Balki fatah ka daro madar nusrate khudavandi par hai ki vo jab chahta hai to firishton ki foj asman se maidane jangh me utar kar musalmano ki imdad va nusrath farma deta hai aur musalman killate tadad aur samane jangh na hone ke bavajud fatah mand ho kar kuffar ke lashkaron ko tahas nahas kar ke fana ke ghat utar deta hai, Magar Allah Tala ne iss ke liye do sharth rakhi hai, ek sabr aur dusra takva. Agar musalman sabr va takva ke daman ko thame huve khuda ki madad par bharosa kar ke jangh me Aad jayen to Insha Allah Azzawajal hamesha aur har mahaz par fatah mubin musalmano ke khadam chumegi aur kuffar shikhasth kha kar rahe firar ikhtiyar karenge ya musalmano ki mar se fana ho kar finnar ho jayenge. Bas zarurath hai ki musalman sabr va takhva ke hatyaron se lais ho kar khuda ki madad ka bharosa kar ke kuffar ke hamlon ka mukhabla karne ke liye maidan e jangh me istikhamath ka pahad ban kar khade rahen aur hargiz hargiz tadad ki kami aur samane jangh ki killath va kasrath ki parvah na karen kuinki farmane khudavandi hai ki "Vaman Nasru Illa Min Indillahi" ki madad farmane vala to bas Allah hi hai sach kaha hai kahne vale ne.

                                       Kafir Ho To Talvar Pe Karta Hai Bharosa

                                       Momin Ho To Be Taigh Bhi Ladta Hai Sipahi